Uongozi wa klabu ya Yanga umewaomba radhi mashabiki wake baada ya kupoteza mchezo wa kwanza wa kombe la Shirikisho kwa kufungwa mabao 2-1 na Pyramids Fc juzi
Kaimu Katibu Mkuu wa Yanga Dismas Ten amesema wanafahamu matokeo hayo yamewaumiza mashabiki na wanachama wao ambao walikuwa na matumaini makubwa ya kushinda katika mchezo huo uliopigwa jijini Mwanza
Amesema timu inajiandaa kwenda kufanya vizuri kwenye mchezo wa marudiano utakaopigwa Novemba 03 nchini Misri akikiri kuwa watahitaji kufanya kazi ya ziada kuweza kupata matokeo
Ten amesema Yanga itaondoka keshokutwa Alhamisi, Oktoba 31 kuelekea Misri tayari kwa mchezo huo ambao utapigwa Jumapili
Nae Makamu Mwenyekiti Fredrick Mwakalebela amesema pamoja na kupoteza mchezo wa kwanza, hawajakata tamaa, watakwenda Misri wakiwa na lengo la kusaka ushindi
"Hata siku moja hatuwezi kukata tamaa, tunakwenda Misri tukiwa na lengo la ushindi. Tumewaona Pyramids, tunaweza kuwafunga kwao," amesema
Katika michezo yote waliyocheza msimu huu kwenye michuano ya CAF, Yanga haikushinda nyumbani lakini timu imeonekana kuimarika zaidi inapocheza ugenini
