Bodi ya Ligi Kuu Tanzania Bara (TPBL), imekanusha madai ya kumuandaa aliyekuwa Mtendaji Mkuu wa Simba, Crescentius Magori kurithi nafasi ya Boniface Wambura kuwa Mtendaji Mkuu wa bodi hiyo.
Magori amekuwa akihusishwa kuandaliwa kuchukua nafasi ya Wambura tetesi zikishika kasi baada ya TFF kumbadilishia majukumu Wambura
Mwenyekiti wa bodi hiyo, Steven Mgutto amesema ajira ya Mtendaji wa Bodi ya Ligi itatangazwa na wagombea watapaswa kutuma maombi
"Ndani ya siku mbili hizi tunatarajia kutoa tangazo la nafasi za kazi kwa ajili ya kutafuta mrithi wa Wambura ambapo kuna vigezo mbalimbali vinatakiwa kuwepo kwa mgombea anayehitaji kuwania nafasi hiyo, lengo ni kuwa na kiongozi bora," amesema
"Kuhusu suala la Magori nimekuwa nikisikia kutoka kwa watu mbalimbali kuwa ndiye aliyepangwa kurithi nafasi ya Wambura lakini si kweli, ila iwapo atahitaji kuwania nafasi hiyo ni vyema akawasilisha wasifu wake kama ilivyo kwa wadau wengine watakaojitokeza kuomba nafasi hiyo kulingana na vigezo vitakavyotolewa"
