Makamu Mwenyekiti wa Yanga Fredrick Mwakalebela amesema mshambuliaji David Molinga na beki Mustafa Suleyman wataanza kuitumikia timu hiyo kuanzia hatua ya makundi ya michuano ya kombe la Shirikisho iwapo watafanikiwa kuitoa Pyramids Fc
Akizungumza na waandishi wa habari mapema leo, Mwakalebela amesema kulingana na kanuni za CAF za michuano ya ligi ya mabingwa na kombe la Shirikisho haziwaruhusu kucheza hatua ya mtoano
"Napenda nitoe ufafanuzi kuhusu wachezaji wawili ambao watu wamekuwa wakiuliza kama wataweza kucheza mechi dhidi ya Pyramids Oktoba 27"
"Ni suala la kikanuni kwamba wachezaji Molinga na Mustafa wataruhusiwa kuitumikia Yanga kama tutatinga hatua ya makundi ligi ya mabingwa au kombe la Shirikisho"
"Hivyo wachezaji hao tutaendelea kuwatumia kwenye ligi na kama tutatinga makundi wataweza kucheza," amesema
Taarifa hiyo inakinzana na ile iliyotolewa wiki iliyopita na Afisa Habari Hassan Bumbuli ambaye alisema Shirikisho la soka Barani Afrika (CAF) lilikuwa limewahakikishia kuwa wachezaji hao wataruhusiwa kucheza na kinachosubiriwa ni kuwasili kwa vibali vyao
Ni wazi baada ya kufuatilia huko CAF, Yanga imejiridhisha haitaweza kuwatumia wachezaji hao kwa ajili ya mchezo dhidi ya Pyramids FC
