Nahodha Msaidizi wa Yanga Juma Abdul amewataka mashabiki wa timu hiyo kutokata tamaa kufuatia sare ya mabao 3-3 ya mchezo dhidi ya Polisi Tanzania
Abdul ambaye alirejea kikosini kwa mara ya kwanza msimu huu, amesema matokeo waliyopata jana hayakuwafurahisha hata wao wachezaji
"Nikiwa kama nahodha wa timu, na wachezaji wote kwa kweli hatukufurahishwa na matokeo ya mchezo wa leo," amesema
"Mwalimu ameona makosa tuliyofanya na atarekebisha kabla ya mchezo wa Jumapili"
Aidha, akizungumzia tatizo la kuridhika kwa wachezaji baada ya kufunga bao la kwanza, Abdul amesema ni suala ambalo kocha alilizungumza wakati wa mapumziko na ndio maana walirejea wakiwa imara kwenye kipindi cha pili
"Wakati wa mapumziko Mwalimu alizungumza mapungufu yaliyojitokeza kwenye kipindi cha kwanza ndio maana tulirejea tukiwa imara kwenye kipindi cha pili lakini Polisi walifanikiwa kufunga mabao mawili ya haraka haraka hivyo kutufanya tuwe na kazi ya kusawazisha"
"Ninachowaomba mashabiki wa Yanga wasikate tamaa, ligi ndio kwanza imeanza"
"Mwalimu bado anatengeneza timu, bado hana kikosi cha kwanza. Tukubali kuwa timu hii ni mpya"
"Wachezaji, viongozi na mashabiki tunapaswa kuwa kitu kimoja. Nadhani huko mbele timu itafanya vizuri zaidi"
