Mshambuliaji Sadney Urikhob ni miongoni mwa wachezaji waliotangulia kwenye msafara wa kwanza wa kikosi cha Yanga ulioondoka mapema leo kuelekea Zambia tayari kwa mchezo wa marudiano ligi ya mabingwa dhidi ya Zesco United
Sadney alisababisha mkwaju wa penati katika mchezo wa kwanza uliopigwa uwanja wa Taifa ambao ulimalizika kwa sare ya bao 1-1
Ukiachana na changamoto ya kutofunga mabao, Sadney ni mchezaji anayejituma sana kwenye kikosi cha kocha Mwinyi Zahera
Zahera ameonyesha kuwa na imani nae akisisitiza kuwa wakati utafika atafunga mabao
Mchezo wa marudiano dhidi ya Zesco utakaopigwa Septemba 28 huko Zambia, una umuhimu wa kipekee kwa Mnamibia huyo
Kwani kama ataisaidia Yanga kutinga hatua ya makundi atajijengea heshima mbele ya mashabiki ambao wameonyesha kutokuwa na imani nae
Lakini pia mafanikio katika mchezo huo yatamuongezea kujiamini na atafanya vizuri zaidi Yanga itakaporejea kwenye ligi
Ni hivyo hivyo kwa mshambuliaji Juma Balinya ambaye kocha Mwinyi Zahera huenda atamtumia Zambia
Balinya alikosa mchezo wa kwanza kutokana na changamoto ya kutokuwa fiti
Bila shaka kukaa kwake nje kulimpa nafasi ya kuwasoma walinzi wa Zesco na pengine atatumia udhaifu wao kuipa Yanga ushindi siku ya Jumamosi
