Mshambuliaji Mtanzania anayekipiga Nakambala Fc inayoshiriki ligi kuu ya Zambia, Elias Maguli amesema uimara wa Zesco United ni kupitia mashambulizi ya kushitukiza wakitumia washambuliaji wao wa pembeni ambao wana kasi
Baada ya kucheza na Yanga, juzi Zesco ilirejea kwenye ligi kuu ya Zambia ikipata ushindi wa mabao 3-0 dhidi ya Nakambala
Maguli amesema silaha ya Zesco wakiwa nyumbani ni uhodari wao wa kushambulia kupitia pembeni pamoja na mashambulizi ya kushitukiza
"Mabao tuliofungwa sisi yalikuwa ya mashambulizi ya pembeni katika mchezo na Yanga ninachokifikiria ni Zesco watakuwa wanacheza kaunti ataki ili kuwalazimisha Yanga kufanya makosa," Maguli amenukuliwa na Mwanaspoti
"Mawinga wao wana kasi na ndio waliotufunga kwa namna hiyo, lazima Yanga watulie ili kupata ushindi dhidi ya hawa jamaa,lasivyo wanapaswa kujua kwamba sio wepesi"
Katika mchezo wa kwanza uliopigwa uwanja wa Taifa ambao ulimalizika kwa sare ya bao 1-1, Yanga ilifanikiwa kuwabana Zesco kwenye kipindi cha kwanza na pengine wangeweza kufunga mabao mengi kama wangetumia nafasi walizopata
Baadae kwenye kipindi cha pili Zesco walionekana kutawala mchezo zaidi huku Yanga wakishambulia kwa kushitukiza
Uimara wa safu ya ulinzi ya Yanga ulikuwa sababu ya Yanga kupata matokeo kwenye mchezo huo licha ya Zesco kusawazisha dakika za majeruhi
Mabingwa hao wa kihistoria wanajifua wakapate matokeo kwenye mchezo wa ugenini utakaopigwa Septemba 28
