Kocha Mkuu wa Yanga Mwinyi Zahera leo baada ya mazoezi ya timu hiyo yaliyofanyika uwanja wa Taifa, alipata nafasi ya kuzungumza na waandishi wa habari kuelekea mchezo dhidi ya ZESCO United
Pamoja na kuweka bayana maandalizi ya kikosi chake, Zahera alijibu maswali ya waandishi wa habari waliohoji kuhusu makali ya mshambuliaji wake David Molinga ambaye wengi wameonyesha kutokuwa na imani nae
Zahera amesisitiza kuwa Molinga atapata mafanikio Yanga, ni suala la muda tu
"Makambo ambaye mnamsifia hapa, kwenye ligi ya Congo alifunga mabao saba, Molinga amefunga mabao 15, sasa mniambie kati ya Makambo na Molinga nani aliyefunga mabao mengi Congo?," Zahera aliwauliza waandishi wa habari
"Nikwambie kama Molinga hakufunga mabao 15 au 20 kwenye ligi hapa Tanzania nitakupa dola 1000...!"
Kuelekea mchezo dhidi ya ZESCO Zahera amesema wamekamilisha maandalizi yao ambapo wameweza kupitia michezo mbalimbali ya ZESCO ambayo imewasaidia kufahamu ubora na udhaifu wa wapinzani wao
Hata hivyo Yanga itaikabili ZESCO United bila ya Molinga ambaye ataruhusiwa kuitumikia timu hiyo kama itafanikiwa kutinga hatua ya makundi
Usajili wa Mcongomani huyo ulifanyika nje ya muda uliokuwa umetolewa na CAF
