Mshambuliaji wa Yanga David Molinga amewataka mashabiki wa timu hiyo waendelee kumuunga mkono akiahidi kuwapa furaha msimu huu
Molinga amepata na mafanikio kwenye ziara ya Yanga mkoani Mwanza akifunga mabao matatu kati ya manne yaliyofungwa na timu yake katika michezo dhidi ya Pamba na Toto Africans
"Nilichelewa kufika, nilikuta wenzangu wamefanya kazi nzuri, nami nimekuwa nikijituma ili niweze kuwa bora zaidi," alisema Molinga baada ya mchezo dhidi ya Toto Africans jana
"Nawaambia mashabiki waendelee kuniunga mkono, msimu huu ninawaahidi kuwapa furaha"
Jana Molinga alifunga mabao mawili kati ya matatu kwenye ushindi wa mabao 3-0 dhidi ya Toto Africans
Akizungumzia kiwango cha mshambuliaji huyo, mchezaji wa zamani wa Yanga na timu ya Taifa Sekilojo Chambua, amesema Molinga ameonyesha kuwa na kiu ya kutaka kufunga kila mara
"Molinga ameonyesha kuwa na kiu ya kutaka kufunga kila mara, hilo ni jambo jema. Mabao haya aliyofunga bila shaka yatamuongezea kujiamini, " alisema Chambua
"Nafikiri atapata mafanikio Yanga kama ataendelea hivi ingawa bado hayuko sawa kimwili, anahitaji kupunguza uzito"
Kocha wa Yanga Mwinyi Zahera alimpa Mcongomani huyo program ya kupunguza uzito ambapo alisema amepungua kilo 10 katika kipindi cha siku 40
Zahera alisema Molinga alikuja nchini akiwa na kilo 84 lakini sasa ana kilo 74
