Kocha Mkuu wa Yanga Mwinyi Zahera amewataka mashabiki wa timu hiyo kuwa na subira kwa mshambuliaji David Molinga
Juzi katika mchezo wa kirafiki dhidi ya Pamba, kabla ya Molinga kufunga, baadhi ya mashabiki walikuwa wakimzomea huku wengine wakimtaka Zahera amtoe
Hata hivyo baada ya Mcongomani huyo kufunga, wengi waliripuka kwa furaha
Zahera amesema imekuwa ni tabia ya mashabiki kutowapa muda wachezaji wapya pale wanapoanza vibaya lakini baadae huwasifia
"Msimu uliopita Makambo alianza hivihivi. Kuna wakati mashabiki walimzomea wengine wakisema hastahili kucheza Yanga, lakini alipoanza kufunga kila mmoja alimsifia," alisema Zahera
"Molinga namfahamu, ni mshambuliaji mzuri ndio maana nimemleta hapa"
Zahera amesema Molinga anahitaji muda kuweza kuzoea pia amekuwa akimpa program maalum kupunguza uzito
"Wakati anafika nchini, Molinga alikuwa na uzito wa kilo 84. Wakati tunaenda Botswana kucheza na Township Rollers alikuwa na kilo 78 na sasa ana kilo 74"
Molinga alitua Yanga kwa mkopo akitokea klabu ya AC Lega ya DR Congo. Misimu miwili iliyopita yeye na Heritier Makambo walikuwa wakicheza klabu ya FC Lupopo
Zahera amefichua kuwa awali alikuwa na mpango wa kumsajili Molinga lakini iliposhindikana ndipo akamchukua Makambo
Molinga ndiye aliyekuwa mshambuliaji namba moja wa kikosi cha Fc Lupopo wakati huo
