Mchezo wa kwanza wa raundi ya kwanza michuano ya ligi ya mabingwa kati ya Yanga dhidi ya ZESCO United, umepangwa kupigwa Septemba 14 kwenye uwanja wa Taifa, saa kumi kamili jioni
Ni mchezo ambao Yanga inahitaji kupata ushindi ili kujiweka katika nafasi nzuri ya kutinga hatua ya makundi ya michuano hiyo kwa mara ya pili
Kwa Tanzania, Yanga ndio timu ya kwanza kutinga hatua ya makundi ya michuano ya ligi ya mabingwa, ikifanya hivyo mwaka 1998 wakati huo michuano hiyo ikishirikisha timu nane tu
Kocha Mkuu wa mabingwa hao wa kihistoria Mwinyi Zahera amesema wanayo kila sababu ya kushinda mchezo huo unaopigwa ardhi ya nyumbani
Lakini muhimu zaidi amewataka mashabiki kujitokeza kwa wingi uwanjani siku hiyo kuujaza uwanja kama walivyofanya siku ya kilele cha wiki ya Mwananchi
Juzi Zahera aliwaambia waandishi wa habari kuwa kama Simba iliweza kushinda michezo yake ya ligi ya mabingwa iliyopigwa uwanja wa Taifa, kwa nini Yanga nayo isishinde?
Yanga inajifua kwenye uwanja wa Chuo cha Polisi, Kurasini jijini Dar es salaam, lakini inatarajiwa kuelekea jijini Mwanza kuweka kambi maalum kwa ajili ya maandalizi ya mchezo huo
Ikiwa Mwanza Yanga inatarajiwa kucheza mechi mbili za kirafiki dhidi ya Pamba Fc na Mbao FC
