Mwenyekiti wa Yanga Dk Mshindo Msolla amesema baada ya kufanikiwa kutinga raundi ya kwanza ya michuano ya ligi ya mabingwa, sasa wanajipanga kuikabili ZESCO United
Akizungumza usiku wa kuamkia leo kwenye mapokezi ya kikosi cha Yanga uwanja wa Ndege wa Kimataifa wa Mwalimu Julius Nyerere, Dk Msolla amesema anaamini Yanga ina nafasi ya kupata ushindi dhidi ya ZECO na kutinga hatua ya makundi
"Kama Mwalimu atafanyia kazi mapungufu yaliyojitokeza na wachezaji kutambua umuhimu wa mchezo huo, nadhani tutapita," amesema
"Hatumhofii kocha George Lwandamina kwani kwa sasa hatufahamu, tuna timu mpya"
"Labda ni mchezaji mmoja au wawili ambao aliwafundisha ndio wapo"
"Hata Kamusoko aliyeondoka hapa juzi, akija atashangaa kwani atakutana na sura za wachezaji wengi ambao hawafahamu"
Dk Msolla amesema Yanga ina malengo ya kufika mbali kwenye michuano hiyo
Na hata ikitokea bahati mbaya wakatolewa, watakuwa na nafasi nyingine kwenye michuano ya kombe la Shirikisho
Kikosi cha Yanga kimewasili usiku wa kuamkia leo kikitokea Botswana ambako kilifanikiwa kutinga raundi ya kwanza ya michuano ya ligi ya mabingwa baada ya kuichapa Township Rollers bao 1-0
Licha ya kuwasili usiku sana, mashabiki walijitokeza kwenye mapokezi ya mashujaa hao
