Ni mapema sana kukosa imani kwa Zahera

 Miongoni mwa mambo ya kushangaza kutoka kwa baadhi mashabiki wa Yanga ni hili la kupima uwezo wa kocha kupitia michezo ya kirafiki

Kuna mambo kadhaa ambayo mashabiki wa Yanga wanapaswa kufahamu

Kwanza mafanikio ya timu yoyote hayapatikani kwa siku moja, mara chache hutokea lakini hiyo inaitwa bahati

Hata katika maisha ya kawaida mafanikio yanajengwa, unaweka juhudi, maarifa, uvumilivu baadae mambo yanatokea

Ni hivyo hivyo kwenye soka, hata hao Simba ambao leo wanatamba kuliteka soka la Tanzania, iliwachukua zaidi ya miaka mitano kujisahihisha

Inashangaza kuona baadhi ya mashabiki leo wanasema kocha Mwinyi Zahera hafai kwa sababu tu timu haichezi vizuri kwenye michezo ya kirafiki

Wamesahau ni huyu huyu Zahera aliyekuwa na kikosi 'dhaifu' msimu uliopita na kufanikiwa kumaliza nafasi ya pili tena baada ya kufanyiwa 'figisu' nyingi

Zaidi ya nusu ya wachezaji wa Yanga ni wapya na ni hao hao wanaotegemewa kwenye kikosi cha kwanza

Wengi wetu tunakubaliana, baadhi wameonyesha uwezo kwa mchezaji mmoja mmoja lakini kinachokosekana ni muungano wa kitimu

Muunganiko huo utapatikana baada ya wachezaji kuifahamu filosofia ya Mwalimu na wao kuzoeana

Kazi hiyo inaonekana kwani timu imeendelea kuimarika siku hadi siku

Ni bahati mbaya msimu huu michuano ya ligi ya mabingwa imeanza kipindi ambacho Yanga haikuwa tayari

Muda wa maandalizi ulikuwa mdogo huku timu ikimkosa kocha Mkuu na baadhi ya wachezaji waliokuwa wakishiriki michuano ya Afcon

Lakini licha ya changamoto hizo, Yanga haikuwa na mwenendo mbaya sana, imefungwa mechi moja tu ya kirafiki na walionyesha ushindani kwenye mchezo wa kwanza wa ligi ya mabingwa dhidi ya Township Rollers

Nadhani mashabiki wanaohoji uwezo wa Zahera wakati huu wanakosea, pengine wavute subira angalau baada ya mechi tano za ligi wanaweza kupata picha mahali ilipo Yanga

Huu ni wakati wa Wanayanga kuiunga mkono timu yao na kuacha kuponda juhudi zinazofanywa katika kuiimarisha timu, ni suala la muda tu mbivu na mbichi zitafahamika

Kwa sasa Wanayanga wafikirie zaidi mchezo wa marudiano wa ligi ya mabingwa dhidi ya Township Rollers

Matokeo ya michezo ya kirafiki huwa hayana maana yoyote kwa kuwa makocha huitumia michezo hiyo kujaribu mbinu mbalimbali wanazofundisha mazoezini

Na ndio maana Zahera amekuwa akitumia vikosi tofauti tofauti kwenye michezo hiyo, jambo ambalo hawezi kufanya kwenye ligi na michuano ya Kimataifa