Mwenyekiti wa Yanga Dk Mshindo Msolla amesema awamu ya tatu ya shehena ya jezi za Yanga inatarajiwa kuwasili wakati wowote ambapo kutakuwa na mabadiliko ya bei ya jezi hizo
Akizungumza wakati wa uzinduzi wa Tawi la Yanga Kaloleni jijini Arusha leo, Dk Msolla amesema kutakuwa na punguzo la bei ili kuwawezesha mashabiki na wanachama kununua kufuatana na uwezo wao
"Zile jezi tulizozindua kwenye awamu ya kwanza zilikuwa toleo daraja la juu ambazo zilikuwa za wachezaji na ziliuzwa Tsh 35,000/- na baadae likaletwa toleo la mashabiki ambazo ziliuzwa Tsh 30,000/-"
"Tulizungumza na GSM na tukakubaliana, jezi za awamu ijayo, lile toleo la juu zitauzwa kwa Tsh 30,000/- na zile za mashabiki zitauzwa Tsh 20,000/-"
"Lengo ni kuwawezesha mashabiki na wanachama wetu kununua jezi kwa kulingana na uwezo wao"
Aidha Dk Msolla amesema ujio wa jezi hizo utamaliza changamoto ya kukosekana kwa jezi mpya za Yanga madukani
Kampuni ya GSM imeahidi kuwezesha upatikanaji wa jezi za Yanga nchi nzima
