Mkuu wa Wilaya ya Arumeru Mh Jerry Muro ambaye amewahi kuwa Msemaji wa klabu ya Yanga, amesema mchezo wa kirafiki dhidi ya Polisi Tanzania hauwezi kutumika kama kipimo cha uimara wa Yanga
Muro ambaye alikuwepo uwanjani jana kushuhudia mchezo huo ambao Yanga ilifungwa kwa mabao 2-0, alisema matokeo hayo hayakuwafurahisha mashabiki lakini sio kipimo sahihi cha uimara wa timu yao
"Uimara wa Yanga haupimwi kwenye mechi za kirafiki. Tuipime Yanga kwenye mechi za Kimataifa kwa mfano sasa tuko kwenye michuano ya ligi ya mabingwa tunajiandaa kwenda Botswana," amesema
"Tukitoka Botswana tunakuja kuanza ligi, tuipime Yanga kule"
"Yanga ni timu yetu, hii kupoteza leo na Polisi ndio tumeumia lakini tusiipime Yanga hapa"
"Tusimpime Mwalimu hapa"
Hata hivyo Muro ameeleza kutofurahishwa na uamuzi wa kocha Mwinyi Zahera kutowapa nafasi baadhi ya wachezaji ambao mashabiki wengi walifika uwanja wa Chuo cha Ushiriki kuwaona
"Mashabiki wa Yanga wanataka raha, wanataka furaha sasa ni vyema uongozi wa Yanga ukaliangalia hili"
"Hapa mashabiki walikuja kwa wingi uwanjani kuwaona wachezaji wanaowapenda lakini hawakuwepo"
"Hatujawaona akina Ngasa, Tshishimbi na wengineo.."
