Keshokutwa Jumamosi, August 10 2019 Yanga itashuka kwenye uwanja wa Taifa kumenyana na Township Rollers katika mchezo wa kwanza wa ligi ya mabingwa hatua ya awali
Mchezo huo utapigwa saa 12 jioni
Baada ya kuujaza uwanja wa Taifa Jumapili katika tukio la kilele cha wiki ya Mwananchi, kwa mzuka walionao mashabiki, hali inaweza kujirudia Jumamosi
Yanga inahitaji sana sapoti ya mashabiki wake ili kupata ushindi mnono kwenye mchezo huo wa nyumbani
Wingi wa mashabiki uwanjani ni silaha muhimu katika vita ya kusaka ushindi nyumbani
Miaka mitatu iliyopita, ikishiriki michuano ya kombe la Shirikisho Barani Afrika, Yanga iliweka rekodi ya kuujaza uwanja wa Taifa mapema kwenye mchezo dhidi ya TP Mazembe
Mchezo huo uliopigwa Juni 28 2016 na Yanga kufungwa bao 1-0, mageti ya uwanja wa Taifa yalifungwa saa nane ambapo Jeshi la Polisi likilazimika kufanya kazi ya ziada kuwaondoa mashabiki wengi waliobaki nje
Licha ya kupoteza mchezo, Yanga ilikuwa bora na wingi wa mashabiki ulinogesha mtanange huo
Jumamosi ni nafasi nyingine kwa Wanayanga kudhihirisha kuwa jina la 'Wa Kimataifa' hawakupewa kwa bahati mbaya
