Kaimu Kocha Mkuu wa timu ya Taifa ya Tanzania 'Taifa Stars' Etienne Ndayiragije amesema maandalizi ya timu hiyo kuelekea mchezo wa kusaka tiketi ya michuano ya CHAN dhidi ya Kenya, yamekamilika
Keshokutwa Jumapili Julai 28, Stars itachuana na Kenya katika mchezo ambao unahusisha wachezaji wa ndani
Ndayiragije amesema baada ya kufanya mazoezi kwa takribani siku tano, amepata timu itakayoweza kuikabili Kenya Jumapili
Aidha, Ndayiragije amesema wachezaji wote wa timu hiyo wako katika hali nzuri kukiwa hakuna majeruhi
Amewataka Watanzania wote kuiunga mkono timu Jumapili ili iweze kuibuka na ushindi na kujiweka katika nafasi nzuri ya kusonga mbele kabla ya mchezo wa marudiano utakaopigwa nchini Kenya August 04
"Nawaomba Watanzania kuwa kitu kimoja kuhakikisha wanaiunga mkono timu yao ili ipate matokeo mazuri kwenye mchezo huo," amesema
"Nimepata kikosi cha wapinzani wangu nitakachopambana nacho, kuhusu kuwaangalia mechi zao mbalimbali sijafanya hivyo lakini hilo haliondoi ushindi kuelekea mchezo huo"
Amteua Bocco kuwa nahodha
Katika hatua nyingine Ndayiragije amemteua John Bocco kuwa nahodha wa timu hiyo akisaidiwa na wakongwe Juma Kaseja, Kelvin Yondani na Erasto Nyoni
