Yanga italazimika kufanya mabadiliko ya program zake hasa baada ya hapo jana Shirikisho la Soka Barani Afrika (CAF) kutoa ratiba ya michezo ya awali ya michuano ya ligi ya mabingwa barani Afrika
Mabingwa hao wa kihistoria watacheza na Towship Rollers katika mchezo ambao huenda ukapangwa kupigwa siku ya Jumamosi, August 10 katika uwanja wa Taifa
Hivi karibuni uongozi wa Yanga uliweka hadharani mipango yake ya kwenda kuweka kambi nje ya nchi baada ya ratiba ya ligi ya mabingwa kutolewa
Hata hivyo kutokana muda mfupi uliobaki kuelekea mchezo wa kwanza, Yanga inaweza kuendelea kujifua hapahapa Tanzania na baada ya mchezo wa kwanza ikaelekea Afrika Kusini kuweka kambi ya maandalizi ya mchezo wa pili utakaopigwa kati ya August 23-25 huko Botswana
Aidha August 04 Yanga itacheza mchezo muhimu wa kuhitimisha wiki ya Mwananchi, mchezo ambao utatumika kutambulisha kikosi pamoja na jezi za timu hiyo kuelekea msimu ujao
Hata hivyo uongozi wa timu hiyo huenda ukalazimika kutafuta timu nyingine ya kucheza nao August 04 baada ya AS Vita nao kubanwa na ratiba ya mchezo wa awali ligi ya mabingwa
Uongozi wa Yanga leo ulipanga kuzungumza na waandishi wa habari lakini Mkutano huo umeahirishwa ili kuwapa nafasi viongozi wa timu hiyo kujipanga upya baada ya mabadiliko hayo ya ratiba
Aidha kesho Jumanne Yanga ilipaswa kuwa mkoani Dodoma kumenyana na Dodoma Fc kwenye mchezo wa kirafiki, taarifa zinabainisha mchezo huo huenda ukaahirishwa
Kwa sasa kikosi cha Yanga kinaendelea kujifua mkoani Morogoro
