Mwenyekiti wa Yanga Dk Mshindo Msolla amewataka wachezaji wa timu hiyo wajitambue na wajisikie fahari kuchezea Yanga
Dk Msolla na baadhi ya viongozi waandamizi wa Yanga jana walishuhudia mazoezi ya timu hiyo mkoani Morogoro ukiwemo mchezo wa kirafiki dhidi ya Moro Kids
Baada ya mchezo huo, Dk Msolla alipata nafasi ya kuzungumza na wachezaji ambapo aliwataka kutimiza majukumu yao ipasavyo ili kuhakikisha timu hiyo inatimiza malengo iliyojiwekea msimu huu
Aidha Dk Msolla alisema atatafuta muda mzuri zaidi kuweza kuzungumza na wachezaji hao mmoja mmoja
"Wote mliosajiliwa Yanga mna vipaji, tunataka mtumie vipaji vyenu kuipa mafanikio timu kwenye michuano yote tutakayoshiriki," alisema
Dk Msolla pia alipata nafasi ya kuzungumza na Wanachama wa klabu ya Yanga mkoani Morogoro ambapo aliwapa jukumu la kuhakikisha kambi ya timu hiyo inakuwa ya mafanikio makubwa
Yanga imekamilisha wiki mbili tangu itue mkoani Morogoro kujiandaa na msimu mpya wa ligi kuu ya Tanzania Bara pamoja na michuano mingine
