Klau ya Yanga, imeachana na mpango wa kumsainisha mkataba mshambuliaji Thomas Ulimwengu, kuelekea msimu ujao wa Ligi Kuu Tanzania Bara.
Awali, klabu hiyo ilikuwa na nia ya kumsainisha straika huyo anayecheza JS Soura ya Algeria na timu ya Taifa ya Tanzania, Taifa Stars.
Taarifa kutoka ndani ya klabu hiyo, ilieleza kuwa tayari wanao washambuliaji watatu ambao wana uwezo mzuri hivyo wameona haina haja ya kumsainisha.
"Tulikuwa tunamuhitaji Ulimwengu, lakini hata hivyo tumeona kiwango chake hakitofautiani na wachezaji wengine ambao tunao, hivyo tumeamua kuachana naye kwenye mipango yetu," kilieleza chanzo hicho
Alisema kwa sasa wamekamilisha usajili kwa wachezaji wote ambao walikuwa wanahitajiwa na kocha hivyo kilichobaki kwa sasa ni kujiandaa kwa kambi inayotarajia kuanza Julai 7 kwa ajili ya msimu ujao wa Ligi Kuu pamoja na michuano ya kimataifa.
Alisema wanaamini kwa usajili waliofanya utaisaidia timu hiyo kutimiza malengo ambayo wamejiwekea, ikiwa pamoja na kutwaa ubingwa wa ligi kuu, ambao kwa sasa umechukuliwa na wapinzani wao Simba kwa misimu miwili mfululizo.
