Klabu ya Yanga imekabidhiwa eneo lenye ekari saba na Mkuu wa Mkoa wa Dar es Salaam, Paul Makonda, ukiwa ni utekelezaji wa ahadi aliyoitoa wakati wa hafla ya uchangiaji ya Kubwa Kuliko.
Akikabidhi eneo hilo, lililoko kigamboni kisarawe 2, Makonda amesema eneo hilo ni Mali ya Wananchi, hivyo hata kama itatokea Yanga kuwa kampuni lakini eneo litabaki kuwa Mali ya klabu na Wanayanga.
"Naikabidhi bodi ya wadhamini, maana yake ni kwamba hili ni eneo la Wanayanga, ningeweza kukabidhi Wakurugenzi lakini wao wanaweza kufanya ujanja, ukashangaa eka mbili zimemegwa zimebaki tano," alisema Makonda.
Makonda aliwataka viongozi na Wanayanga kuanzia kujenga eneo hilo Mara moja na kuwapiku wapinzani wao Simba ambao muda mrefu tangu wapate eneo hawajafanya kinachokusudiwa.
Aidha Makonda ameitaka Yanga kujenga kwanza eneo walilopewa kisha waombe lingine kama hilo halitatosha badala ya kuomba kuongezewa eneo kabla walilonalo hawajalitumia.
Awali, Makamu Mwenyekiti wa Yanga, Fredrick Mwakalebela, kwa niaba ya Wanayanga alimshukuru Makonda kwa kutoa eneo hilo kwa klabu ya Yanga na kuahidi kulitumia kwa kulingana na makusudio.
Hafla ya makabidhiano ya eneo hilo ilihudhuriwa na wadau mbalimbali wakiwemo wanachama na mashabiki wa Yanga
