Beki anayemaliza mkataba kunako klabu ya Lipuli Fc Ally Mtoni 'Sonso' ameomba kusaini mkataba kuitumikia Yanga baada ya kumalizika kwa michuano ya AFCON 2019, imefahamika
Mtoni alishamalizana na uongozi wa Yanga kilichokuwa kimebaki ni yeye kusaini mkataba zoezi ambalo ameomba lifanyike baada ya AFCON
Beki huyo kisiki aliyepenya kwenye kikosi cha wachezaji 23 watakaoiwakilisha Tanzania huko Misri, amesema amekuwa na ndoto ya kucheza soka nje ya nchi pengine michuano ya AFCON inaweza kumfanya akatimiza ndoto hiyo
"Niliwaomba viongozi wa Yanga kwa vile tumeshakubaliana kila kitu, wanisubiri nimalize kwanza jukumu ya Misri, kisha mengine yatafuata. Sikutaka kukurupuka kwa vile haya ni maisha ukijichanganya tu wakati mwingine inakula kwako" Sonso amenukuliwa na Mwanaspoti
"Mashindano haya ya Afcon kama mchezaji unapata nafasi ya kucheza na ukafanya vizuri unaweza kuwashawishi viongozi na makocha wa timu nyingine kupata wazo la kukusajili, hivyo nimeona ni vyema kucheza Afcon nikiwa huru na baada ya kumalizika ndio hatma yangu itafahamika"
Mpaka sasa Yanga tayari imekamilisha usajili wa mabeki wawili wa kigeni Lamine Moro na Mustapha Suleyman
Kocha Mwinyi Zahera amepania kuimarisha safu yake ya ulinzi ambayo msimu uliomalizika iliwategemea Kelvin Yondani, Andrew Vicent na Abdallah Shaibu 'Ninja'
Kuna taarifa Yanga imepanga kumuongezea mkataba Ninja kisha kumtoa kwa mkopo
