Michakato ya usajili tayari imeanza kushika kasi ambapo dirisha la usajili litafunguliwa rasmi mwezi ujao na kufungwa mwishoni mwa mwezi wa saba
Macho na masikio ya Wanayanga wengi yameelekezwa kwa uongozi mpya wa timu hiyo na kocha Mwinyi Zahera kwani kimsingi, ni wao waliobeba matumaini yao wakiwa na shauku ya kuona timu inarejesha makali yake ya miaka kadhaa iliyopita
Huu ni msimu wa pili Wanayanga hawana furaha ya kweli kwani timu yao haina ushindani ukilinganisha na watani zao Simba ambao wanatambia mafanikio wanayopata sasa
Licha ya kupita kwenye hali ngumu ya kiuchumi, juhudi zimefanyika na zinaendelea kufanyika kwa wadau wa Yanga kuichangia timu yao ili iweze kuunda kikosi imara
Matumaini ni makubwa, ambapo uongozi mpya wa Yanga umeahidi kuirejesha furaha ya Wana Jangwani msimu ujao
Ili kuhakikisha timu yake inakuwa imara msimu ujao, Zahera ameweka vigezo kwa wachezaji wanaopaswa kuendelea kuichezea Yanga
Mcongomani huyo amepanga kutumia idadi ya michezo aliyocheza kila mchezaji kama kigezo cha kuwaengua baadhi yao
Inaelezwa wachezaji wote ambao hawakufanikiwa kucheza angalau nusu ya mechi za msimu huu hawataendelea kuichezea Yanga msimu ujao
Aidha Zahera ameweka sifa kwa wachezaji wapya kuwa ni lazima wawe na uwezo mkubwa kuliko wachezaji waliopo
Zahera amepanga kusajili wachezaji wa kikosi cha kwanza na sio wa kukaa benchi.
Ametaka wachezaji wapya wawe chachu ya kuwafanya wachezaji waliopo kujituma zaidi ili kupata nafasi ya kucheza jambo ambalo anaamini litaongeza ushindani
