Mwenyekiti wa klabu ya Yanga Dk Mshindo Msolla amewaahidi mashabiki wa timu hiyo kuwa msimu ujao utakuwa wa furaha kwao
Msolla aliyechaguliwa kwa kishindo wiki iliyopita, ameahidi kuirudisha Yanga katika anga za Kimataifa, kazi hiyo uongozi mpya tayari umeianza
Tangu kuondoka wa aliyekuwa Mwenyekiti wa Yanga Yusufu Manji, timu imeshindwa kusimama kutokana na kukumbwa na changamoto za kiuchumi
"Nafahamu kwamba mashabiki wa Yanga wamekosa furaha kwa muda mrefu, lakini nawaahidi kuanzia msimu ujao furaha itarejea tena kama zamani," amesema
"Baada ya msimu huu kumalizika, tutaiunda upya timu yetu kwa kushirikiana na kocha Mwinyi Zahera. Lazima tuunde timu imara ambayo itawafanya Wanayanga watembee kifua mbele"
Dk Msolla ameahidi kurudisha utaratibu wa enzi ya Manji ambapo timu hiyo ilikuwa ikienda kuweka kambi nje ya nchi, upo uwezekano wa mabingwa hao wa kihistoria kwenda kuweka kambi Ulaya kwa ajili ya maandalizi ya msimu ujao
Aidha mabadiliko ya mfumo ya uendeshaji ni kipaumbele cha kwanza cha Dk Msolla na timu yake baada ya kipindi hiki cha mpito
"Nina mipango endelevu ya kuifanya klabu kujiendesha kibiashara na kuwa klabu tajiri"
"Hii ni timu kongwe tangu mwaka 1935, lakini imeshindwa kujikomboa kiuchumi na kutegemea wafadhili katika kujiendesha, hivyo siko tayari kuona hilo na nitahakikisha naacha alama," amesema
