Mwenyekiti wa Yanga Dk Mshindo Msolla amesema kikosi cha timu hiyo kinahitaji mabadiliko makubwa na wamejipanga kuyafanya
Baada ya kuondoshwa kwenye michuano ya kombe la FA kwa kufungwa mabao 2-0 na Lipuli Fc katika mchezo wa nusu fainali, Yanga ina matumaini madogo ya kushiriki michuano ya CAF msimu ujao, kwani nafasi pekee iliyobaki ni ya kushinda taji la ligi kuu
Hata hivyo nafasi ya kutwaa taji la ligi kuu ni ndogo sana kwani itategemea na wapinzani wao Simba wanaongoza ligi kufanya makosa katika michezo iliyobaki huku Yanga ikihitaji kushinda michezo yote
Dk Msolla aliyechaguliwa mwishoni mwa wiki kuiongoza Yanga, amesema wanafahamu wana kazi kubwa ya kufanya kuirejesha Yanga katika ubora wake
"Nilizungumza na kocha hata kabla sijachaguliwa kuiongoza Yanga, aliniambia wachezaji ambao anadhani wanastahili kuendelea kubaki Yanga hawazidi 10"
"Yeye alihitaji tumpatie Bil 1.5 ili aweze kufanya usajili, lakini kwa hali ilivyo hata kama zitahitajika Bilioni 2 tutazitafuta," DK Msolla aliliambia Mwanaspoti
"Tuna kazi kubwa ya kufanya ndani ya kikosi chetu, Hatuna ubora ambao tunastahili kuwa nao. Ubora wa kikosi tulichonacho haulingani na ukubwa wa jina la Yanga"
Viongozi wapya wa Yanga wameanza kazi kwa kishindo ambapo baada ya kuchaguliwa siku ya Jumapili, usiku huo huo walielekea mkoani Iringa kuiunga mkono timu ilipocheza na Lipuli Fc
