Mwenyekiti wa Kamati Maalum ya uhamasishaji Mh Anthony Mavunde amesema zoezi la michango litahitimishwa Mei 18 Hoteli ya Serena jijini Dar es salaam wakati wa hafla maalum ya chakula cha usiku
Akizungumza juzi kwenye uchaguzi wa Yanga, Mavunde amesema siku hiyo wanatarajiwa kukusanya zaidi ya Mil 500 kutoka kwa wadau mbalimbali wa klabu hiyo
Aidha alisema pia watatangaza kiasi cha fedha zilizopatikana tangu zoezi hilo lililopanza chini ya Kamati yake
"Zoezi la michango limeanza muda mrefu na hamasa ni kubwa, hivyo Mei 18 katika hoteli ya Serena tutakuwa na hafla maalum kwa ajili ya michango kabla ya zoezi kufungwa na kukabidhi michango kwa uongozi"
"Tunawaomba Wanayanga waendelee kuchangia, Mei 18 tutaweka hadharani kiasi cha fedha zilizopatikana kabla ya kuukabidhi uongozi"
Hafla ya 'Gala Dinner' awali ilipangwa kufanyika Jumamosi ya Mei 11, hata hivyo iliahirishwa kufuatia kifo cha Mwenyekiti wa Makampuni ya IPP Dk Reginald Mengi ambaye alikuwa mdau wa Yanga
Hafla hiyo itafanyika wiki moja baada ya Wanayanga kumzika Dk Mengi anayetarajiwa kupumzishwa kwenye nyumba yake ya milele keshokutwa Alhamisi, Machame
Lakini habari njema ni kuwa lengo la kukiboresha kikosi cha Yanga kwa ajili ya msimu ujao litafanikiwa baada ya Mwenyekiti mpya wa timu hiyo Dk Mshindo Msolla kumuhakikishia kocha Mwinyi Zahera kuwa watampatia fedha zote alizohitaji kwa ajili ya usajili
"Bilioni moja na nusu aliyotaka Zahera kwa ajili ya usajili tutampatia. Hata akitaka fedha zaidi tutamuongeza," alisema Dk Msolla wakati akihitimisha kampeni juzi
