Ngasa yuko tayari kwa majukumu ya Stars

Winga wa Yanga Mrisho Ngasa amesema bado ana ndoto ya kurejea kwenye kikosi cha timu ya Taifa ya Tanzania 'Taifa Stars' kwani bado anao uwezo wa kuitumikia timu hiyo

Jana Ngasa aliiongoza Yanga kupata ushindi muhimu wa bao 1-0 dhidi ya Azam Fc, akifunga bao hilo kwenye dakika ya 13

Akizungumza baada ya mchezo huo, Ngasa amesema uwezo bado anao lakini ni jukumu la kocha kuamua

"Rekodi zangu timu ya Taifa zinajieleza, ni mfungaji bora wa muda wote. Bado uwezo ninao, naamini siku moja nitarejea tena kuitumikia Stars," amesema

Ngasa ameifungia Stars mabao 25 hivyo kumfanya kuwa kinara wa kupachika mabao muda wote akifuatiwa na Mbwana Samatta mwenye mabao 16