Kocha Mkuu wa Yanga Mwinyi Zahera amemtaka msemaji wa Simba Haji Manara afuatilie mambo yanayomuhusu zaidi kwani hawezi kumzuia kuongea ukweli kwa madudu yanayofanywa na Bodi ya ligi ya TFF
Juzi Manara aliitaka TFF kumchukulia hatua Zahera akidai kuwa amekuwa akilituhumu shirikisho hilo kuihujumu Yanga huku likiibeba Simba
Zahera amesema kama TFF wanaona anakosea basi wanaweza kumfungia lakini yeye anazungumza mambo ya kweli ambayo yanafanyika na hayako mahali pengine popote duniani
"Niwape mfano, Simba itacheza na Tanzania Prisons Mbeya, halafu itabaki mkoani Mbeya kusubiri kucheza na Mbeya City je huu ni uongo?," alihoji Zahera
"Sasa huyu Manara anayesema Zahera anasema sana anawaambia TFF wanifungie. Kama wanaweza wanifungie lakini mimi sitaacha kusema ukweli"
Yanga iliwahi kucheza Tanga na Coastal Union, kisha ikatakiwa kusafiri kwenda Singida kucheza na Singida United halafu siku mbili baadae kurudi tena Tanga kucheza na JKT Tanzania
Ukiangalia ratiba ya michezo ya viporo ya Simba, itacheza michezo yote ya kanda ya ziwa kisha itaelekea Mbeya halafu kurudi jijini Dar es salaam kwani michuano ya AFCON ya vijana itakuwa imemalizika
Aidha ratiba hiyo huenda ikaipa nafasi Simba kucheza michezo yote ya ugenini kwanza halafu kumalizia nyumbani michezo ya kukamilisha ligi kwani imepangiwa kucheza michezo saba mfululizo ugenini
