Mzee Ibrahim Akilimali ni Mwanachama maarufu wa Yanga ambaye anafahamika sana kwani amekuwa kinara wa kupaza sauti pale anapoona mambo hayaendi sawa
Wakati mwingine alionekana kwenda kinyume na Wanachama wenzake wa Yanga hivyo kujikuta akiingia kwenye mivutano ya hapa na pale
Lakini hili la uchaguzi limemfurahisha Katibu huyo wa Baraza la Wazee Yanga ambapo amesema atachinja Mbuzi baada ya Yanga kupata viongozi wapya
Mzee Akilimali amesema tatizo kubwa la Yanga ni uongozi lakini sasa baada ya uchaguzi anaamini viongozi watakaopatikana wataweza kumaliza changamoto zinazoikabili timu hiyo
"Tunahitaji viongozi ambao wanajua thamani ya nembo yetu ya Yanga"
"Nachukizwa na mambo ya kupitisha bakuli ni aibu kwetu na hiyo yote inachangiwa kwa kiasi kikubwa na kutokuwepo viongozi," Mzee Akilimali amenukuliwa na Mwanaspoti
"Uwepo wa viongozi ungeweza kutukwamua kwenye aibu ya kuchangishana"
"Sisemi kuwa ni vibaya wanachama kuichangia klabu, lakini kwa ukubwa wa Yanga si vema kutegemea fedha kutoka kwa wanachama peke yake"
"Nitafurahi na kuwaunga mkono viongozi ambao kwa pamoja wanayanga tutawapa ridhaa ya kutuongoza. Kwa namna mchakato wa uchaguzi unavyoenda nadhani tutapata viongozi bora"
Yanga itafanya uchaguzi wa kuwapata viongozi wapya katika kipindi cha wiki mbili zijazo, May 05 2019
Baada ya wagombea waliokuwa viongozi awamu iliyopita kuondolewa kwenye mchakato baada ya kuwekewa mapingamizi, sura mpya zinatarajiwa kuchaguliwa kuiongoza Yanga kwa kipindi cha miaka minne
Inaelezwa moja ya mikakati ya Yanga baada ya kupata viongozi wapya ni kukamilisha mchakato wa mabadiliko kwa kubadili mfumo wa uendeshaji wa klabu hiyo ambao kimsingi tayari ulishapitishwa na Wanachama wa klabu hiyo
Kwa sasa Yanga inawashirikisha mashabiki na wanachama wake kuichangia ili iweze kuvuka salama katika kipindi cha mpito
Yanga inahitaji fedha za kuboresha kikosi chake kwa kufanya usajili wa wachezaji wapya pamoja na kuwa na fedha za kulipa mishahara ya wachezaji angalau kwa msimu wote ujao wakati uongozi mpya ukiendelea na mchakato wa mabadiliko
