Nyota wa zamani wa Yanga 'legendary' Sekilojo Chambua amesema wanachama wa klabu hiyo wanahitaji kuchagua viongozi wapya ambao wataipa mafanikio klabu hiyo
Aidha Chambua ameshangazwa na baadhi ya wagombea ambao walikuwa viongozi kurudi tena kwenye kinyang'anyiro licha ya kushindwa kutumia vyema nafasi walizokuwa nazo awali
Chambua ambaye ni Mwanachama wa Yanga, amewataka wanachama wenzake kuwa makini katika kampeni kwa kusikiliza hoja za wagombea ambazo zinatakiwa kulenga mabadiliko ambayo yanaweza kuivusha klabu kutoka katika mfumo wa kuwa tegemezi na kuingia katika mfumo wa uendeshwaji wa kujitegemea.
"Yanga ni klabu kubwa inahitaji kupata viongozi wenye upeo mkubwa wa kuifanya iwe mfano wa kuigwa ndani na nje ya nchi, watakaoweza kufanya hivyo ni watu wapya ambao watakuja na mawazo mapya na siyo viongozi waliopita miaka ya nyuma na kushindwa kuifanya timu ikawa na mifumo bora," Chambua amenukuliwa na Mwanaspoti
"Tulikuwa na mfumo wa kumtegemea tajiri mmoja, ameondoka unaona kabisa timu ilivyoyumba na kukosa ubora wa kiushindani. "
"Sidhani kama kuna wanachama wanapendezewa na hili, hivyo naomba iwe changamoto kwetu kuhakikisha tunachagua kiongozi bora na mwenye nia nzuri ya kuivusha klabu kutoka hapa ilipo na kuipeleka sehemu nyingine”
"Inashangaza kuona viongozi wameitumikia timu kwa muda mrefu bila mafanikio wanarudi tena na ndiyo maana nawasisitiza kuwa makini katika hili kwa kusikiliza zaidi hoja za watu wapya, kwani waliokuwepo mwanzoni walishindwa wapi kama wanataka kurudi tena kwa mara nyingine?" alihoji.
Mchakato wa uchaguzi wa Yanga uko katika hatua ya mchujo wa wagombea ambapo leo Kamati ya uchaguzi huenda ikaweka hadharani majina ya wagombea wenye sifa ya kuendelea na mchakato wa uchaguzi huo
Uchaguzi utafanyika May 05 2019
