Vinara wa ligi kuu ya Tanzania Bara Yanga leo wako dimbani uwanja wa CCM Kirumba kuikabili Kagera Sugar katika mchezo wa raundi ya 31
Baada ya ushindi wa mabao 2-0 dhidi ya African Lyon juzi, Yanga imepania kuendeleza wimbi la ushindi ili kujiimarisha kileleni mwa msimamo wa ligi
Kocha Mwinyi Zahera amesema wamefanya maandalizi ya kutosha kuelekea mchezo huo na ana matumaini vijana wake wataibuka na ushindi
"Mchezo dhidi ya Kagera Sugar utakuwa wa nguvu kuliko mchezo tuliocheza na African Lyon," amesema Zahera
"Nimewapa wachezaji mazoezi maalum ili kuwaondolea uchovu uliotokana na safari na kucheza mfululizo"
"Malengo yetu ni kushinda michezo yote iliyobaki, bado nafasi ya kuchukua ubingwa tunayo"
Yanga imejikusanyia alama 71 baada ya kushuka dimbani mara 30. Inaongoza ligi kwa tofauti ya alama nane dhidi ya Azam Fc inayoshika nafasi ya pili ikiwa na alama 63
