Mlinzi wa kati wa Yanga Andrew Vicent 'Dante' amesema watahakikisha wanashinda michezo yote nane iliyobaki ili kuweka hai matumaini ya kutwaa ubingwa
Yanga inaongoza ligi ikiwa imejikusanyia alama 71 baada ya kushuka dimbani mara 30 ikifuatiwa na Azam Fc yenye alama 63 ikiwa imeshuka dimbani mara 30 pia
Simba inashika nafasi ya tatu ikiwa na alama 57 baada ya kushuka dimbani mara 22
Kama Yanga itashinda michezo yote nane iliyobaki, itafikisha alama 95
"Hatutakiwi kuvipigia hesabu viporo vya Simba, tunapaswa kushinda mechi zilizobakia ili kuishi malengo yetu, Yanga tuna nafasi kubwa ya ubingwa kwani hakuna anayejua matokeo kabla ya mechi," Dante amenukuliwa na Mwanaspoti
"Tumeshinda dhidi ya African Lyon ni kitu kizuri kwetu kwani kinakuwa kinaendelea kutuweka kwenye mazingira mazuri kwenye msimamo wa ligi kuu Bara.
"Lakini pia tunaelekeza nguvu kwenye michuano ya FA, kuhakikisha tunapata tiketi ya kushiriki Kombe la Shirikisho Afrika kwa mwakani"
Licha ya Simba kuwa na michezo mingi ya viporo, inabanwa na muda mchache uliobaki kuelekea ligi kumalizika kwani itahitaji kucheza michezo yake mfululizo ili kuwezesha ligi hiyo kumalizika kwa wakati
Wakati baadhi ya timu zikisalia na michezo mitano hadi nane, Simba itahitaji kushuka dimbani mara 16 katika kipindi cha mwezi mmoja na siku kadhaa
