Baraza la Vyama Vya Michezo wa Mpira wa Miguu la Afrika Mashariki na Kati (Cecafa) limezipongeza timu nne za ukanda wake kwa kufuzu fainali za mashindano ya Mataifa ya Afrika (Afcon) yaliyopangwa kufanyika nchini Misri mwezi Juni na Julai.
Tanzania, Uganda, Kenya na Burundi zimefanikiwa kufuzu katika fainali hizo zilizopangwa kuanza Juni 21 mpaka Julai 19 mjini Cairo.
Katibu Mkuu wa Cecafa, Nicholas Musonye alisema kuwa kitendo cha kuingiza timu nyingi katika mashindano makubwa ya Mataifa ya Afrika ni ushahidi tosha kuwa soka la ukanda wa Cecafa linazidi kupata maendeleo makubwa na kuomba nchi ambazo hazijafikia hatua hiyo kujitahidi.
"Kwa kweli hii ni sifa kubwa kwa Cecafa na heshima kwa mchezo kwa ujumla. Ni miaka mingi hatujawahi kupata timu nyingi katika mashindano makubwa ya Afrika, kwa kweli in ni faraja kwetu," alisema Musonye.
Musonye amesema kuwa ni wakati wa kuanza maandalizi ya fainali za Afcon ambazo ni mashindano magumu kutokana na kushirikisha timu magwiji ya soka ya bara la Afrika.
