Kikosi cha timu ya Taifa ya Tanzania 'Taifa Stars' jana Jumatatu kilianza mazoezi ya kujiandaa na mchezo wa kusaka tiketi ya kutinga fainali za AFCON 2019, kikijiandaa kucheza na Uganda Cranes Jumapili
Stars inayoshika nafasi ya tatu kundi L ikiwa na alama tano sawa na Lesotho inayoshika nafasi ya pili kutokana na faida ya matokeo baina ya timu hizo, inahitaji kushinda Jumapili huku ikiomba Lesotho isipate ushindi katika mchezo dhidi ya Cape Verde
Stars itakuwa na kibarua cha kuifunga Uganda ambayo tayari imefuzu kwa fainali za michuano hiyo zitakazofanyika mwezi Juni nchini Misri ikiwa imejikusanyia alama 13
Katika mchezo wa kwanza baina ya timu hizo uliopigwa nchini Uganda, matokeo yalikuwa suluhu ya bila kufungana, Stars ikiwa timu pekee iliyopata pointi moja mbele ya Uganda katika kundi L
Kelvin Yondani, Feisal Salum na Gadiel Michael ni miongoni mwa wachezaji walioanza kujifua na kikosi cha Stars jana huku beki Andrew Vicent akiachwa kutokana na majeruhi nafasi yake ikichukuliwa na Erasto Nyoni
