Ifikapo mwishoni mwa msimu idadi kubwa ya wachezaji wa Yanga watakuwa wamemaliza mikataba ya kuitumikia timu hiyo huku presha ya kuwapoteza baadhi ya nyota walion'gara ikipanda
Wakati ikisubiriwa ripoti ya mahitaji ya usajili itakayotolewa na kocha Mwinyi Zahera mwezi May msimu utakapomalizika, Yanga imelazimika kuanza mapema mkakati wa kuwabakisha baadhi ya wachezaji ambao tayari wameanza kumezewa 'mate' na timu pinzani
Miongoni mwa wachezaji ambao mikataba yao iko ukingoni na kuwepo ulazima wa kuhakikisha hawanyakuliwi na timu pinzani ni pamoja na Ibrahim Ajib na Papi Kabamba Tshishimbi
Wakati Ajib akin'gara zaidi katika kikosi cha Yanga kwa kufunga na kutoa pasi nyingi za mabao, Tshishimbi amerudi katika kiwango chake na hivyo kuwa miongoni mwa wachezaji wanaowaniwa zaidi na timu nyingine
Yanga ina idadi kubwa ya wachezaji ambao mikataba yao inamalizika mwishoni mwa msimu miongoni mwa wachezaji hao ni pamoja na Amissi Tambwe, Raphael Daudi, Juma Mahadhi, Abdallah Shaibu, Pato Ngonyani, Juma Abdul, Haji Mwinyi, Pius Buswita, Said Juma, Thabani Kamusoko, Mrisho Ngasa, Matheo Anthony na Gadiel Michael
Mwishoni mwa msimu Yanga huenda ikafanya mchakato mkubwa wa usajili kwa ajili ya msimu ujao hasa kama itapata nafasi ya kutinga michuano ya CAF kwa kutwaa ubingwa wa ligi kuu au kombe la FA
Hata hivyo hatma ya usajili huo itategemea na kiasi cha fedha zitakazokusanywa kutoka kwa michango ya mashabiki na wanachama wa klabu hiyo kupitia mpango ulioasisiwa na kocha Mwinyi Zahera
