Yanga imemalizana na wakala wa Zulu

Shirikisho la soka nchini Tanzania (TFF) kwa kushirikiana na uongozi wa Yanga limemaliza mgogoro wa kimasilahi kati ya wakala wa aliyekuwa kiungo wa Yanga, Justin Zullu ‘Mkata Umeme’, Karin Nir baada ya uongozi wa Yanga kuvunja mkataba wa kiungo huyo.

Wakala huyo alipeleka mkataba wa mteja wake katika ofisi za TFF akitaka kuizuia Yanga kumtumia kiungo Papi Kabamba Tshishimbi akidai utaratibu haukufuatwa kuvunjwa kwa mkataba wa Zulu.

Novemba, mwaka jana, Yanga ilimsainisha Zullu mkataba wa mwaka mmoja mbele ya wakala huyo raia wa Israel, lakini hivi karibuni Yanga iliachana naye kutokana na kiwango chake kutowaridhisha.

Nir amesema kuwa, TFF imetumia busara kulimaliza suala la mteja wake na Yanga kwani tayari alipanga kwenda kushitaki Shirikisho la Soka la Kimataifa (Fifa).

“Nimeshaondoka Tanzania lakini jambo kubwa ni kwamba Yanga wamekubali kuvunja mkataba wa mchezaji wangu, mkataba umevunjwa kwa makubaliano ya pande zote mbili tena kwa usawa," amesema.

"Namshukuru Katibu Mkuu wa TFF kutokana na kuweza kulimaliza suala hili kwa amani, niwashukuru Yanga kwa kuonyesha ushirikiano hasa katibu wao, Boniface Mkwasa.

"Hatuwezi kuendelea na malumbano tena kati yetu kwani tutaendelea kushirikiana kama ilivyokuwa awali,” amesema Nir.

Justin Zullu alipanga kuishitaki Yanga Fifa ili alipwe dola 100,000 (Sh milioni 221) baada ya mkataba wake kuvunjwa kiholela