Taarifa iliyotolewa na Shirikisho la Mpira wa Miguu Tanzania (TFF) mapema leo, imeondoa hofu kwa Yanga kumtumia beki Abdallah Shaibu 'Ninja' kwenye mchezo dhidi ya Simba kesho.
Taarifa hiyo imesema Kamati ya Nidhamu ya TFF imeridhia ombi la Yanga la kuahirisha kusikiliza shauri la Ninja kutokana na beki huyo kuwa anakabiliwa na majukumu ya timu yake akiwa mkoani Tanga wakati alipoitwa kwenye kikao cha Kamati hiyo
"Kamati ya Nidhamu ya Shirikisho la Mpira wa Miguu Tanzania (TFF) imeridhia ombi la Yanga la kuahirisha kusikiliza shauri dhidi ya Abdallah Shaibu kwa vile wakati anapata mwito wa kuhudhuria akiwa mkoani," imesema taarifa ya TFF
"Sasa shauri dhidi yake litasikilizwa katika kikao kijacho, na Kamati haitapokea udhuru wowote isipokuwa kama atakuwa na majukumu katika timu ya Taifa"
Hii ni habari njema kwa Yanga ambayo sasa haina hofu ya kumtumia beki huyo aliyeimarisha kiwango chake siku za karibuni
