Katika mchezo wa duru ya kwanza uliomalizika kwa suluhu ya bila kufungana, kocha Mkuu wa Yanga Mwinyi Zahera alifanikiwa kimbinu na kuwaacha na mshangao wale waliokuwa wakiamini Yanga ingepoteza mchezo huo
Mchezo huo uliochezwa mwanzoni mwa msimu ulikuwa na presha kubwa kwa Yanga ambayo wakati huo ilikuwa bado haijakaa sawa.
Zahera alitambua kikosi chake kilikuwa bado hakijakaa sawa licha ya kuwa kilikuwa kimetoka kushinda michezo minne ya ligi dhidi ya Mtibwa Sugar, Stand United, Coastal Union na Singida United
Baada ya kuwa imecheza michezo 23 na kufanikiwa kushinda michezo 18, sare 4 na kupoteza mchezo mmoja, kwa sasa kikosi cha Yanga kiko tofauti kabisa na kile kilichocheza na Simba kwenye mchezo wa duru ya kwanza
Kwa wale ambao bado wanafikiria mazingira ya mchezo wa Jumamosi yatakuwa sawa na yale ya mchezo uliopita basi wajiandae kisaikolojia
1. Wachezaji wa Yanga wameongeza kujiamini
Yanga iko kileleni mwa msimamo wa ligi ikiwa na alama 58, alama 22 zaidi ya Simba inayoshika nafasi ya nne ikiwa na alama 36. Achana na hesabu ya idadi ya viporo kwani bado Simba italazimika kushinda ili alama zihesabiwe
Mwanzoni mwa msimu kutokana na changamoto zilizokuwa zikiikabili Yanga, timu hiyo ilikuwa ikicheza bila ya kuwa na malengo yoyote, hili aliwahi kulizungumza hata kocha Zahera
Lakini sasa baada ya mafanikio waliyoyapata kwenye ligi, timu hiyo imeweka malengo, inataka ubingwa wa ligi na kombe la FA
Hivyo kwa wachezaji wa Yanga huu ni mchezo wa kufa na kupona. Kwani wanajua kama watashinda, watajisafishia njia ya kueleka ubingwa
2. Viwango vya wachezaji Yanga vimeimarika
Katika mchezo wa Jumamosi Simba wasitarajie mteremko kwani baadhi ya wachezaji viwango vyao vimeimarika mara dufu kuliko wakati timu hizo zilipokutana mwaka jana
Miongoni mwa wachezaji hao ni nahodha Ibrahim Ajib. Hakun'gara kwenye mchezo uliopita lakini wasilitarajie hilo katika mchezo wa Jumamosi
Ajib wa sasa amepevuka na baada ya kuongezewa majukumu ya unahodha, amekuwa nguzo muhimu ya mafanikio ya Yanga
Mabao yake sita na 'assist' zake 13 zinamfanya kuwa silaha muhimu sana ya Yanga kuelekea mchezo huo
Pia Mrisho Ngasa, Feisal Salum, Paulo Godfrey, Abdallah Shaibu hawa ni miongoni mwa wachezaji ambao viwango vyao vimeimarika sana ukilinganisha na walivyokuwa mwanzoni mwa msimu
3. Ujio wa Tshishimbi , Banka
Simba imekuwa ikifanikiwa kwenye michezo mingi kutokana na kuweza kutawala safu ya kiungo. Hata hivyo ujio wa Mohammed Issa 'Banka' na kupona kwa Papi Tshishimbi kumeongeza ushindani wa safu ya kiungo ya Yanga
Banka ambaye alianza kuichezea Yanga mchezo uliopita dhidi ya JKT Tanzania baada ya kumaliza adhabu yake, ameonyesha yuko tayari kwa mikikimikiki ya mchezo huo
Aidhi Tshishimbi alikuwa majeruhi kwa muda mrefu. Lakini kiwango alichoonyesha kwenye mchezo uliopita, kimempa Zahera sababu ya kumtumia kwenye mchezo huo. Tshishimbi ni kawaida yake kung'ara katika 'game' kubwa
4. Makambo, Tambwe wapo
Heritier Makambo ndiye kinara wa upachikaji mabao katika ligi kuu ya Tanzania Bara akiwa na mabao 11.
Alikosa mchezo uliopita akitumikia adhabu ya kadi tatu za njano. Safu ya ulinzi ya Simba pamoja na mlinda lango Aishi Manula wameonyesha madhaifu mengi katika michezo ya hivi karibuni. Watakuwa na bahati kama Makambo hatawapeleka nyavuni
Amissi Tambwe yeye anafahamika, mchezo dhidi ya Simba ndio mchezo wake wa kujidai. Anaweza asifanye vizuri kwenye michezo kadhaa lakini unapokuja mchezo dhidi ya Simba huwa hafanyi makosa. Kwa sasa yuko timamu kiafya kuliko alivyokuwa mwanzoni mwa msimu
Simba wanaweza kudhani ushindi dhidi ya Al Ahly unawapa haki ya kushinda mchezo wa Jumamosi. Waweke akiba ya maneno kwani kitakachotokea siku hiyo hawataamini
