Mtendaji Mkuu wa Bodi ya Ligi Boniface Wambura amesema licha ya kushindwa kuhudhuria kikao cha Kamati ya saa 72, beki Abdallah Shaibu 'Ninja' anaruhusiwa kuitumikia Yanga hadi pale Kamati ya Nidhamu ya TFF itakapokaa kujadili suala lake
Juzi Jumapili Februari 10 Shaibu alishindwa kuhudhuria kikao cha Kamati ya Saa 72 alikokuwa ameitwa kutoa utetezi wake baada ya kutuhumiwa kumpiga kiwiko mchezaji wa Coastal Union
Shaibu alishindwa kuhudhuria kikao hicho kwa kuwa alikuwa na majukumu ya kuitumikia Yanga iliyokuwa na mchezo dhidi ya JKT Tanzania
Aidha Wambura amesema tofauti na msimu uliopita, ambapo mchezaji angeweza kusimamishwa kusubiri shauri lake, msimu huu kanuni hiyo imerekebishwa na mchezaji anaweza kuendelea kuitumikia timu yake akisubiri Kamati ya Nidhamu itakapoketi
Kwa maana hiyo Ninja huenda akawepo kwenye kikosi cha Yanga kitakachoikabili Simba Jumamosi Februari 16 kama Kamati ya Nidhamu haitakuwa imekaa na kufanya maamuzi ya shauri lake
