Vinara wa ligi kuu ya Tanzania Bara Yanga wameacha alama saba kati ya tisa katika michezo mitatu iliyopita
Baada ya kufungwa na Stand United bao 1-0, Yanga ililazimishwa sare katika michezo miwili iliyopita dhidi ya Coastal Union na Singida United
Kesho Yanga inashuka tena katika dimba la Mkwakwani kuikabili JKT Tanzania katika mchezo mwingine unaotarajiwa kuwa na ushindani mkali
Ni mchezo ambao Yanga inahitaji kushinda ili isivuruge zaidi mipango yake ya kutwaa ubingwa wa ligi kuu msimu huu
Nahodha wa Yanga Ibrahim Ajib amesema wachezaji wote wanatambua umuhimu wa alama tatu kwenye mchezo huo na watahakikisha wanapata matokeo mazuri
Ajib amewataka mashabiki wa timu hiyo wasikate tamaa kwa kuwa bado ni mapema sana kuiondoa timu hiyo kwenye mbio za ubingwa
"Kwanza kitu cha kushangaza ni kuona tunakatishwa tamaa kwa kupoteza mchezo mmoja na kutoka sare michezo miwili, haya ni matokeo ya kawaida katika soka ila ubingwa bado upo wazi tunawaomba wanachama watuunge mkono na kutawapa ile raha waliyozoea," amesema Ajib
"Hata sisi tunaumizwa na kinachotokea kikubwa tunamshukuru Mungu kwa kuambulia pointi mbili katika mchezo wa Coastal na Singida tunaamini bado tuna safari ngumu kuhakikisha tunafikia malengo tuliyojipangia"
Baada ya mchezo dhidi ya JKT Tanzania kesho, kikosi cha Yanga kitarejea jijini Dar es salaam kujiandaa na mchezo dhidi ya Simba utakaopigwa Jumamosi ijayo, Februari 16 2019
