Tangu kuondoka kwa aliyekuwa Mwenyekiti na Mdhamini wa Yanga Yusufu Manji, mambo yameyumba Jangwani.
Athari zimekuwa kubwa zaidi kwa kuwa timu haikuwa na mpango mbadala, ilikuwa tegemezi kwa Manji kwa asilimia 100
Naamini magumu inayopitia Yanga sasa limekuwa funzo zuri kwao na hata kwa timu nyingine ambazo bado zinatumia mfumo wa kutegemea mfuko wa mtu mmoja
Msimu uliopita Yanga ilishindwa kufanya usajili mzuri kutokana na ukweli kwamba HAIKUWA NA FEDHA.
Hata msimu huu Yanga imeshindwa kuwasajili wachezaji iliyowataka hasa katika usajili wa dirisha dogo kwa kuwa HAIKUWA NA FEDHA.
Mashabiki wamewalalamikia viongozi wao kwa kumkwamisha kocha Mwinyi Zahera baada ya kushindwa kuwasajili wachezaji aliokuwa amewapendekeza.
Lakini ukweli ni uleule kilichopelekea mipango hiyo ikakwama ni kwa sababu Yanga HAIKUWA NA FEDHA
Kocha Mwinyi Zahera amebaini changamoto hiyo na sasa ameamua kuchukua hatua kwa kuwashirikisha Wana Yanga ambao kimsingi ndio wenye timu
Ameweka wazi mipango yake ya msimu ujao kuwa ni kusajili wachezaji wazuri wenye hadhi na watakaoipa Yanga mafanikio makubwa.
Sasa badala ya Wana Jangwani kulalamika tena kuwa mchezaji fulani ameshindwa kusajiliwa kwa sababu ya ukosefu wa fedha, ni wao watakaotoa fedha za usajili
Kwa umoja na wingi wao, jambo hili linawezekana na kwa kuchangia angalau Tsh 2,500/- tu kwa mwezi, mipango hiyo itakamilika
Pamoja na mambo mengine, fedha hizi ambazo Wana Jangwani wanahimizwa wachangie, zitatumika kusajili na kulipa mishahara ya wachezaji
Kama timu itashindwa kusajili wachezaji wazuri msimu ujao, lawama hazitakuwa za viongozi pekee, bali zitakuwa kwa Wana Jangwani wote kama watashindwa kutimiza wajibu wao
Alichofanya Zahera ni kuweka utaratibu mzuri ambao utahakikisha fedha zinazochangishwa zinakuwa salama
Hivyo zoezi hili linaloendelezwa sasa ni mhimu na ni vyema kila mmoja wetu akaendelea kuchangia kadiri anavyoweza ili kuhakikisha malengo ya timu yanafanikiwa
Naamini hiki ni kipindi cha mpito, timu ikishapata uongozi kamili utaratibu mzuri zaidi wa kuiendesha Yanga utapatikana
Tukumbuke, ni jukumu la kila mmoja wetu kuichangia timu sasa ili baadae tusilalamike kuwa tumeshindwa kufanya usajili wa maana..
