Kocha Mkuu wa Yanga Mwinyi Zahera amewatoa hofu mashabiki wa timu hiyo akiwataka waendelee kuiunga mkono timu yao ili itimize azma ya kutwaa ubingwa msimu huu
Juzi Yanga ilipoteza mchezo wake wa kwanza msimu huu dhidi ya Stand United, matokeo ambayo yamewasononesha mashabiki wa timu hiyo
Zahera amesema wachezaji wake walipambana kwenye mchezo huo lakini walikosa bahati.
Amesema wataendelea kupambana katika michezo ijao ili kuhakikisha wanatwaa ubingwa
"Haukuwa mchezo mwepesi, wachezaji wangu walipambana, lakini hatukuwa makini kuzitumia nafasi tulizozitengeneza, nawapongeza Stand kwa ushindi," alisema Zahera na kuongeza,
"Kwetu bado mapambano yanaendelea, hatujakatishwa tamaa kupoteza mchezo huu. Tutapambana kutimiza lengo letu la kutwaa ubingwa msimu huu"
Baada ya kumalizika michuano ya SportPesa, Yanga inakabiliwa na michezo mitatu ya ugenini dhidi ya Coastal Union, Singida United na JKT Tanzania kisha kurejea jijini Dar es salaam kuikabili Simba
Michezo hii minne inayofuata itatoa mwanga wa hatma ya ubingwa kwa vinara hao wa ligi wanaoongoza kwa tofauti ya alama tisa dhidi ya Azam Fc iliyo nafasi ya pili
