Baada ya wanachama wa Yanga kuzuia uchaguzi wa kujaza nafasi zilizowazi uliokuwa umepangwa kufanyika jana, Januari 13 huenda Yusufu Manji akarejea katika nafasi ya Uwenyekiti wa klabu hiyo imefahamika.
Mwaka jana kwenye Mkutano Mkuu wa Yanga, Wanachama waliikataa barua ya kujiuzulu ya Manji wakimtaka arejee katika nafasi yake.
Novemba 11, 2018 Mwenyekiti wa Baraza la Wadhamini la Yanga George Mkuchika aliwathibitishia WanaYanga uamuzi wa Manji kuridhia kurejea klabuni hapo akiwa tayari kuanza kazi Januari 15, 2019 kulingana na barua aliyoandika
Sasa kwa mujibu wa barua hiyo, Manji anapaswa kuripoti kazini na kuanza kazi rasmi siku ya kesho Jumanne
Baadhi ya Wanachama wa Yanga walikwenda Mahakamani kupinga uchaguzi mdogo wa klabu hiyo kusimamiwa na TFF wakitaka ufafanuzi wa Mahakama juu ya nani mwenye uhalali wa kusimamia uchaguzi huo
Aidha Wanachama hao wanataka Katiba ya Yanga iheshimiwe. Katiba hiyo inahalalisha Maamuzi yao kupitia vikao vyao rasmi.
Wakati hatma ya uchaguzi huo ikiwa gizani kutokana na zuio la Mahakama, ni dhahiri Yanga inahitaji kuwa na uongozi kamili wa kuweza kuisimamia klabu hiyo
Juzi Salum Mkemi mmoja wa wajumbe wa Kamati ya Utendaji ambaye alijiuzulu, alitangaza kurejea katika nafasi yake akidai barua yake ya kujiuzulu haikujibiwa
Mkemi aliongeza kuwa kwa sasa Kamati ya Utendaji pia haina uwezo wa kuijadili barua yake kutokana na kukosa sifa.
Uamuzi huo wa Mkemi unaweza kutengeneza mgogoro mwingine kwani nafasi yake ni miongoni mwa nafasi zilizotangazwa na TFF kuwa wazi
