Baada ya hapo jana kuilaza KVZ kwa bao 1-0 na kukaa kileleni mwa msimamo wa kundi B kwenye michuano ya kombe la Mapinduzi, mabingwa wa kihistoria wa Tanzania Yanga leo wamejifua visiwani Zanzibar kujiandaa na mchezo unaofuata dhidi ya Azam Fc.
Mchezo huo utapigwa kesho Jumamosi, Januari 05 kwenye uwanja wa Amaan.
Yanga imedhihirisha kuwa na kikosi kipana kwani wachezaji wengine ambao hawakusafiri kwenda Zanzibar nao wamejifua kwenye uwanja wa Chuo cha Polisi, Kurasini jijini Dar es salaam kujiandaa na michezo ya ligi.
Licha ya kuwa na kikosi kilichosheheni wachezaji wengi kutoka timu ya vijana ya Yanga, Kocha Msaidizi wa timu hiyo Noel Mwandila amesema hawaihofii Azam Fc na wako tayari kupambana nayo kesho
Katika mchezo wake wa kwanza, Azam fc iliyowajumuisha washambuliaji wa zamani wa Yanga Donald Ngoma na Obrey Chirwa huku kikosi chake kikiwa na wachezaji nane wa kigeni, ililazimishwa sare ya bao 1-1 na Jamhuri.
