Mdau mkubwa wa klabu ya Yanga Mwigulu Nchemba amewataka mashabiki na wanachama wa klabu hiyo kuendelea kuichangia Yanga kwa kuwa ni timu yao (timu ya Wananchi).
Licha ya kuwa Rais wa Singida United, Mwigulu huwa hafichi U-Yanga wake ambapo amefichua kuwa hata usajili wa Feisal Salum 'Fei Toto' aliukamilisha yeye mahsusi kwa ajili ya Yanga kama mchango wake kwa klabu hiyo.
"Fei Toto hakusajiliwa na Singida United hivyo hakuwa mchezaji wetu," Mwigulu aliwaambia wanaandishi wa habari waliohoji kwa nini mchezaji huyo aliyesajiliwa kutoka JKU alitolewa Singida United na kupelekwa Yanga.
"Nilimsajili kutoka JKU kwa ajili ya kumpeleka Yanga. Wakati ule tulikuwa tumapambania kwa kuwa Yanga ilikuwa bado haijaamua wachezaji inaotaka kuwasajili. "
Fei Toto ni miongoni mwa wachezaji bora kabisa waliosajiliwa na Yanga mwezi Juni 2018. Amekuwa moja ya 'engine' za Yanga zilizoifanya timu hiyo mpaka sasa iwe haijapoteza mchezo kwenye ligi.
Mabao yake mawili aliyofunga kwenye ligi, ni miongoni mwa mabao bora kabisa yaliyofungwa mpaka sasa.
