Florent Ibenge kocha Mkuu wa timu ya Taifa ya DR Congo ndiye Mkufunzi wa timu ya AS Vital Club ambayo imepangwa na Simba kundi D kwenye michuano ya ligi ya mabingwa barani Afrika hatua ya makundi.
Mwinyi Zahera kocha wa Yanga anafanya kazi pamoja na Ibenge katika timu ya Taifa ya DR Congo yeye akiwa kocha msaidizi. Ibenge na Zahera wanafahamika kuwa marafiki wa muda mrefu
Uwepo wa Zahera hapa nchini huenda ukamnufaisha Ibenge na timu yake ya AS Vital hasa timu hiyo itakapokutana na Simba katika michezo ya hatua ya makundi inayoanza mwezi ujao.
Mbali na AS Vital Club katika kundi D pia zimo Al Ahly na Soura ya nchini Algeria ambayo anacheza mshambuliaji Thomas Ulimwengu.
Al Ahly ilicheza fainali ya ligi ya mabingwa michuano iliyomalizika mwaka huu wakati AS Vital wao walicheza fainali ya michuano ya kombe la Shirikisho iliyomalizika mwezi uliopita.
Mafanikio anayopata Ibenge na kikosi chake cha AS Vital ndio yanayomhamasisha Zahera ambaye nae anataka kuhakikisha anaifikisha Yanga kwenye ngazi za juu katika michuano ya CAF.
Hakuna shaka Zahera ataifikisha Yanga mbali katika michuano hiyo msimu ujao kama itafanikiwa kutwaa ubingwa wa ligi kuu ya Tanzania Bara msimu huu.
