Kiungo Haruna Moshi 'Boban' anaweza kuwa sehemu ya kikosi cha Yanga kitakachoivaa Mbeya City Jumamosi ijayo, Disemba 29 katika mchezo wa ligi kuu ya Tanzania Bara baada ya kupona majeraha yake.
Juzi Boban aliichezea Yanga kwa mara ya kwanza kwenye mchezo wa kombe la FA dhidi ya Tukuyu Stars na kupata majeraha (mshtuko wa nyonga) yaliyopelekea atolewe nje katika dakika ya 28.
Afisa Habari wa Yanga Dismas Ten amethibitisha kuwa hali ya mchezaji huyo inaendelea vizuri ambapo jana alifanya mazoezi mepesi ya kukimbia na leo anatarajiwa kuungana na wenzie katika maandalizi ya mchezo dhidi ya Mbeya City.
Kocha Mwinyi Zahera alitambia usajili wa kiungo huyo mkongwe akiahidi kuwa Boban atawanyamazisha wale wote wanaosema amekwisha.
Yanga inatarajiwa kuondoka kesho Alhamisi kuelekea mkoani Mbeya kwa usafiri wa ndege tayari kwa mchezo dhidi ya Mbeya City.
