Kocha Mkuu wa Yanga Mwinyi Zahera anatarajiwa kuwasili nchini leo akitokea Ufaransa alikokwenda wiki iliyopita kushughulikia masuala binafsi ya kibiashara.
Taarifa zilizopatikana mapema leo zimebainisha Zahera atatua uwanja wa Ndege wa Kimataifa wa Julius Nyerere saa nane mchana.
Kuondoka kwake wiki iliyopita kuliibua hofu miongoni mwa mashabiki wa Yanga wakiamini huenda kocha huyo alikuwa 'amesepa' moja kwa moja kukimbia changamoto za kiuchumi zinazoikabili Yanga.
Hata hivyo akiwa Ufaransa Zahera aliwahakikishia WanaYanga kuwa atarudi na kusisitiza hakufuata maslahi kwenye klabu ya Yanga.
Kulithibitisha hilo juzi aliwataka mashabiki wa Yanga kuichangia timu ili iweze kusafiri kwenda Mbeya kwa usafiri wa Ndege mwenyewe pia akiahidi kuchangia pesa ya ziada kama kutakuwa na upungufu.
Zahera pia amekuwa akitoa pesa zake kuwapa wachezaji wanapofanya vizuri
Ni kocha ambaye kwa sasa amejipambanua kuwa kipenzi cha mashabiki wa Yanga kutokana na kujitoa kwake katika kipindi hiki ambacho Yanga inapitia.
