Muro akumbushia enzi zake Yanga

Mkuu wa Wilaya ya Arumeru Jerry Muro alikuwa miongoni mwa mashabiki waliojitokeza kuiunga mkono Yanga kwenye mchezo dhidi ya African Lyon uliopigwa katika uwanja wa Sheikh Amri Abeid jana

Uwepo wake uwanjani hapo uliibua shangwe na nderemo miongoni mwa mashabiki na Wana Yanga waliosafiri na timu kutoka jijini Dar es salaam

Licha ya kuwa na majukumu ya kitaifa kwa sasa, Muro hakusita 'kuhanikiza' uwanjani na hakuficha furaha yake baada ya mchezo huo kumalizika kwa Yanga kushinda bao 1-0

"Siku zote nawaambia, ikiwaka mulika ikizima papasa! Ngariba huwa haogopi kojo, na ndio maisha yetu sisi. African Lyon wamekuja Arusha wamekutana na Ngariba na biashara imekwisha!" Muro alisema

"Safari hii Manara hana cha kujifariji, tangu tumeanza ligi hatujawahi kupoteza mchezo. Hii ndio Yanga ile ya Kimataifa."

"Sisi ni wa Kimataifa na wale ni wa matopeni, hii itabaki kuwa ivyo. Sisi ndo sisi wengine wote mafisi!"

"Simba walienda Zambia wakawa wa maonyesho ya sabasaba. Wale ni Simba wa maonyesho kama tulionao Mikumi, Serengeti na maeneo mengine. Hawa sio Simba wa nyika"

Wakati huo akiwa msemaji wa Yanga, Muro alikuwa kiboko ya msemaji wa Simba Haji Manara ambaye kuwa wakati alitishia kwenda Polisi kumshitaki kutokana na matani yake

Muro ndiye aliyeitungia Simba jina la 'Wamatopeni'