Nidhamu, kujituma siri ya mafanikio Yanga

Yanga iko kileleni mwa msimamo wa ligi kuu ya Tanzania Bara ikiwa imejikusanyia alama 41 baada ya kushuka dimbani mara 15

Mwanzoni mwa msimu mabingwa hao wa kihistoria hawakupewa nafasi ya kufanya vizuri lakini kikosi kimekuwa kikiimarika mchezo hadi mchezo.

Kocha wa Yanga Mwinyi Zahera amesema vijana wake wanafanya vizuri kwa kuwa wanafuata kile wanachoelekezwa.

Aidha amesema wachezaji wana ari, nidhamu na wanajituma kuhakikisha wanapata matokeo katika kila mchezo bila ya kujali changamoto zinazowakabili

Zahera amejipambanua kwa kuifanya timu yake isiwe tegemezi. Wakati mwingine Yanga imekuwa ikipata matokeo bila ya uwepo wa wachezaji wake waandamizi

Yanga itakuwa na nafasi ya kujiimarisha zaidi kileleni mwa msimamo wa ligi Jumapili ijayo kama itaichapa Ruvu Shooting kwenye mchezo wa raund ya 16

Baada ya mchezo huo Yanga itaelekea mkoani Arusha kuikabili African Lyon kwenye mchezo wa kiporo Disemba 20 2018