Ajib awapa neno wanaomfananisha na Chama

Siku chache zilizopita kumeibuliwa mjadala kwenye mitandao ya kijamii baada ya mdau mmoja wa soka kuchambua uwezo wa wachezaji Ibrahim Ajib wa Yanga na Cleotus Chama wa Simba na kufikia mwafaka kuwa Ajib ni bora zaidi ya Mzambia huyo kutokana na ukweli kwamba Ajib anan'gara akiwa kwenye kikosi kilicho na mazingira magumu.

Hata hivyo hilo lilipingwa vikali na Msemaji wa klabu ya Simba Haji Manara pamoja na mashabiki wengi wa Simba wanaodai kuwa Chama ndiye mchezaji bora zaidi wa sasa hapa nchini na huku Manara akienda mbali zaidi kwa kusema pengine Chama ndiye mchezaji bora zaidi kuwahi kucheza nchini.

Hata hivyo jana mashabiki wa Yanga walimkumbusha Manara kuwa baba yake mzazi, Sunday Manara alikuwa bora sana nyakati zake hadi kupachikwa jina la 'Computer'.

Hivyo kusema hajawahi kutokea mchezaji kama Chama hapa Tanzania ni kumkosea heshima baba yake mzazi ambaye amejijengea heshima ya kipekee katika klabu ya Yanga na nchi kwa ujumla.

Nae Ajib aliyelengwa kwenye mjadala huo ametia neno kuwa anafarijika kuona kila mchezaji anayedhaniwa ni bora basi ni lazima ashindanishwe nae

Ajib amesema jambo hilo litaendelea kutokea hata watakapowaleta wachezaji wengine.

Ukiachana na maneno ya mashabiki, takwimu zinambeba Ajib kuwa kiungo bora zaidi miongoni mwa wote wanaoshiriki ligi kuu ya Tanzania Bara msimu huu.

Ajib amefunga mabao matano na ametengeneza mabao 10. Kwa jumla amehusika kwenye mabao 15 kati ya 29 yaliyofungwa na Yanga mpaka sasa.

Chama anayeaminishwa kuwa bora sana, amefunga mabao mawili na kutengeneza mawili tu.

Ubora wa mchezaji haupimwi kwa chenga zake za maudhi au kuuchezea mpira bali utapimwa kutokana na mchango wake kwa timu husika.

Leo hii akina Cristiano Ronaldo na Lionel Messi wametwaa tuzo nyingi za mwanasoka bora wa dunia kuliko wengine wote kutokana na mchango wao kwa timu zao.

Naamini wapo wachezaji wengi mafundi zaidi yao lakini kwa kuwa hawakuzisaidia timu zao kufanya vizuri waliishia kusifiwa tu bila ya kupata tuzo.